Lumby Cottage tómatsósan

Húshaldið hefur breyst mikið um helgina, ekki aðeins er tengdamóður Smábóndans hér í sinni mánaðarlegu heimsókn heldur hefur Móðir mín líka reist hingað til Danmerkur og því hef ég þær báðar hér á sama tímanum, það er mikið lagt á herðar mínar,  en við höfum unað okkur vel hér við mat og drykk í góðaveðrinu, Eins og ég sagði frá síðast þá er Anna Dan farin að liggja á eggjunum hér úti í hænsnakofa, það hljóp heldur mikið kapp í Smábóndann við þessi tíðindi og þráhyggjufullur yfir því að fá sem mest út úr nýtilkomnum móðurtilfinningum Önnu þá tróð ég undir hana eins mikið af eggjum og mögulegt var, en hún snéri á mig og fór af eggjunum og byrjaði annað hreiður við hliðina, kennir manni að vera ekki að skipta sér of mikið af náttúrunni, hún leikur á mann,,, ég hef því flutt hana inní hundabúrið hans Miles Davies sem tekur því með jafnaðargeði og fær Anna  frið að þessu sinni og færi ég henni mat og drykk að hreiðrinu og tek þannig fullan þátt í óléttunni,,, Anna, eins og aðrar mæður er ekki uppá sitt besta í skapinu þegar ég kem að sinna henni og höfum við bæði ég og Nína Sif fengið að kenna á gogginum hennar,, Það leiðinlega við þetta allt saman var að öll eggin sem hún lá á eru ónýt, því ekki er vitað hversu stropuð þau voru orðin og því var þeim hent, hér hendum við sjaldan hlutunum en það var ekki neitt annað í boði að þessu sinni.  Það veldur Smábóndanum kvíða að taka á móti ungunum því ég hef ekki hugmynd um hvernig maður sinnir hænsnaungum, ég hef áhyggjur af því að Halldór Laxness verið þeim ekki fyrirmyndar faðir þar sem hann hefur ekki verið þekktur fyrir blíðu og tilfinningasemi hingað til, og því hefur drjúgur hluti undanfarinna kvöldstunda farið í að lesa sér til, ég get ekki betur séð en að það þurfi að útbúa sérstaka fæðingardeild sem er lokuð frá umheiminum þar sem þeir fá að stíga fyrstu skrefin án þess að eiga það á hættu að verða fyrir árásum og hefur Smábóndinn þegar hafist handa við smíðina, hversu lengi nýja fjölskyldan á að vera í þessu nýja heimili sínu er óvíst og þarfnast frekari lesningar.

Sprettan í matjurtagarðinum er ótrúleg og fyrir þann sem er vanur sprettunni á Íslandi er þetta mikill munur, Radísurnar má sjá stækka ef maður horfir á þær og kartöflurnar eru að verða tilbúnar, baunir eru komnar vel á veg og tómatarnir mínir eru rauðir og fallegir, því bjó ég til tómatsósu tengdamóðurinnar í dag, hún er svosem ekki flókin en

ég baka saman í eldföstu móti

alla tómatana sem ég fann, bæði í ísskápnum og á tómattrjánum mínum,,,vel saltaða og pipraða,

ferskan hvítlauk ca 6 geira,, 

slatta af fersku basil,

einn gulan lauk

eina litla papriku

og hálfan chili,

til tilraunar setti ég 4 radísur í mixið að þessu sinni til að fá aðeins meira "bite" í þetta

sulla ólífuolíu yfir þetta

,,,, þegar þetta er farið að taka lit tek ég þetta út og kæli, ég mauka þetta svo í matvinnsluvél og út kemur besta tómatsósa sem heimilisfólkið fær, gengur með öllum mat, en er best með pasta og fiski að mínu mati,,

Þess utan hefur Smábóndinn verið upptekinn við að organizera matarbúrið enn eina ferðina, nú hefur allt fengið að fjúka þaðan út sem ekki tengist mat og alveg klárt að þetta er matarbúr, öllum kryddum hefur verið komið þarna inn og allt fengið sinn stað í búrinu, aftur,, Móðir mín og Tengdamóðir voru þess utan svo góðar að færa okkur allskyns kræsingar frá landinu bláa, og var sérstaklega gott að fá Saltfisk og hangikjetsálegg,, þarf að sýna Ítalanum sem vinnur fyrir okkur hangikjetið okkar á Mánudaginn ,,, draga aðeins úr Ítalska matarmontinu,,,,, ég er þess fullviss að íslenska hangikjetið á fullt erindi í sömu deild og Ítalska Parmaskinkan,,,

Perutré, fyrsta uppskeran af Radísum og Anna Dan liggur á,,,

Það er Smábóndanum sérstakt gleðiefni að ósættið í hænsnakofanum hefur að mestu leyti verið leyst, eins og ég sagði frá í síðasta pistli þá hefur verið gjá á milli mín og Halldórs Lax þar sem hann hefur beitt tvær af hænunum mínum miklu einelti undanfarnar vikur, ég hef varið miklum tíma og púðri í að sannfæra Halldór um að það borgi sig ekki að vera með svona skæting og að öll hænsnin í skóginum eigi að vera vinir, hann hefur ekki tekið þær fyllilega í sátt, en þetta er á réttri leið,  það er líka eins gott því leitin að hænsnahvíslara sem gæti hjálpa til gekk ekki vel, kannski það sé markaður fyrir slíkt starf fyrir Smábóndann.  Eftir páska skifti Smábóndinn um gír hvað varðar markaðsetningu á Bútíkinni hér við Lumby Cottage og færði auglýsingaskiltið útí götu þar sem gangandi, hlaupandi og hjólandi vegfarendur Nr Lyndelse sjái afurðirnar betur, og má segja að Smábóndinn hafi hitt naglann á höfuðið og hefur salan tekið kipp, heilar 200 krónur DK hafa skilað sér og eftir ca 400 í viðbót stendur fjárfestingin undir sér og hægt að greiða lánadrottnum búsins sitt til baka, því eins og alþjóð veit þá rýrir það sjálfstæði bændanna að skulda mikið.  Af bændastörfunum er það að frétta að matjurtir eru ofarlega á baugi, kartöflurnar eru komnar vel upp, radísurnar sömuleiðis og hefur Smábóndinn verið að laumast niður í garð til að bragða á þeim, mér finnst allt grænmeti vera betra þegar það er smátt, þá er eins og það sé sætara en þegar það hefur stækkað aðeins, en auðvitað má ekki vera of mikið að þessu því þá verður uppskeran engin,  auk þess hefur verið snyrt í kringum og vökvað reglulega. 

Það bættist í ávaxtatrjáaflóruna um helgina þar sem Hr Smábóndi fjárfesti í Perutré sem ætti að færa mér uppskeru að nokkrum árum liðnum, auk þess sem það ætti að falla vel inní þau ávaxtatré sem eru fyrir

Maiskornið sem ég setti niður í síðustu viku hafði ekki skilað sér Smábóndanum til mikils ama og hefur því var sett í gang hernaðaráætlun og ég færði pottana inn og setti fyrir framan kamínuna og er stofa heimilisfólksins nú full af mold og pottum Frú Smábónda til ama.  Það hefur skilað sér og nú er allt á fullu og um næstu helgi ætla ég að planta því út í garð.

Það sem er ánægjulegast er að Anna Dan, eina svarta hænan mín hefur lagst á eggin og neitar að færa sig, það þýðir að Smábóndinn fær Free Range Organic kjúkling í matarbúrið sitt fyrir Haustið, sem og fleiri varphænur fyrir veturinn, ekki veitir af því eftirspurnin eftir eggjum hefur vaxið stöðugt.  Það má segja að Smábóndinn hafi stressast dálítið upp við að sjá að ein af hænunum er lagst á, og ekki seinna að vænna en að taka örlítið til hjá henni og gera stemminguna örlítið meira kósý í hænsnahúsinu, ég tek jafnvel frá allan betri mat úr eldhúsinu mínu og færi henni.   

  Smábóndinn gengur reglulega um landareignina sem telst vera ca 1 hektari og lætur sig dreyma um svínarækt, eins og áður hefur komið fram, það hefur líka áður verið rætt á hverslags villigötum svínarækt í Danmörku er og því telur Smábóndinn sig hafa full erindi inná þann markað með alvöru svínarækt þar sem dýrin fá að njóta sín og vaxa á eðlilegum hraða til að fullþroska bragð og gæði, en til þess þarf ég meira land, og hef ég því gjóð augum að landi nágranna míns sem enginn er að nota í augnablikinu, en ég þarf líklega að bíða eitt ár áður en þessi draumur verður að veruleika.  á meðan ætlar Smábóndinn að njóta sumarsins og fullkomna hænsnahirðina.

 

kveðja.